上上籤 (Closed)

喺觀塘返左唔短時間既人，應該都知邊度係拿督，一向以來最出名既就係星馬既美食，其中係表表者一定係佢既黑豉油撈麵，不過隨住觀塘碼頭熟食中心既清拆，已經成為歷史。最近北角新開左間串燒店，午市就以拿督作招徠。據講就係拿督冰室主理，咁就試下啦。等位等左20分鐘左右，都還可以接受。今日叫左佢既咖哩豬軟骨，配上黑豉油撈粗麵，豬軟骨炆得夠唸身，肉質爽口唔會黐牙，骨膠原豐富，咖哩入味。黑豉油仍保持到當時水準，油香入味，粗麵爽口彈牙。不過唔知點解今日食有少焦味咁，希望只係一時失手吧。