陸陸雞煲火鍋 (Closed)

天氣一涼少少，朋友們都藉機相約打邊爐，真係每星期都打，已經進入一個瘋狂程度。呢度有得散叫，亦有兩個套餐可以選擇(火鍋或蒸鍋)，我同朋友都好鍾意食海鮮，yo~ 咁就叫餐抵啲啦。一叫個餐就先嚟一碟冰鎮花螺，細細粒，冇沙，等食之前消磨吓時間一流！二人就有半隻雞煲，都幾多吓，如果單點要$158。 辣度分左幾級，BB辣係冇麻味，所以我哋叫左少辣，又麻又辣先夠滋味。 一開蓋係擺到靚靚，店員嚟幫我地攪呀攪，好鬼香！ 肉嫩又夠入味，唔會太辣，好食。 跟住龍蝦湯底上場，入面有原隻龍蝦。 龍蝦湯未夠鮮味，食完啲龍蝦肉我地再放返個殼去淆湯。淥埋啲海鮮，個鮮味先慢慢出嚟。 個海鮮拼盤有九種海鮮，份量十足。最好食係個鮑魚，軟腍鮮甜。頂級牛肩胛片拼豬肉片，捲到靚靚，肉味唔錯。三款手打丸夠彈牙，用料足。餃子雲吞拼盤好飽肚，韓式泡菜餃好大隻。自家炸響鈴、炸魚皮、菇菌類拼盤、鮮菜籃，真係超多野食。最後仲有甜品，竟然有驚喜。 冰鎮西瓜，係有核嘅美人瓜，特別清甜。 另外每人仲有一粒紅豆抹茶雪米糍，唔知咩牌子，未見過，但好好食。呢個餐真係可以用嚟挑戰我食力，我被完全KO，剩左好多野，唔做大嘥鬼，打包回家去。