凝香園 (Closed)

掃街一流凝香園：-魚蛋燒賣-腸粉-魚肉翅-生菜魚肉-夾仔餅-雞蛋仔燒賣實淨有魚味，魚蛋有少少彈牙，腸粉夠滑。而我最鐘意既係生菜魚肉同魚肉翅，佢既魚肉係我食過覺得最鐘意既，魚肉唔係淨粉，食到魚味，比出面啲實淨得黎彈牙，碗仔翅就咁食都夠鮮甜，但當然加多麻油同醋既香味同層次不可同日而語，鐘意食辣既可以叫姨姨加辣菜脯，真係幾辣下。雞蛋仔蛋味夠香夠濃，外脆肉軟，但要即刻食，唔係好快會腍，但佢咬開內面似蛋糕口感既餡令我停唔到口。格仔餅比出面細少少，但我就比較鐘意呢款，一個人食岩岩好，而且佢既花生醬同煉奶落左好多，但又唔會太甜，我勁鐘意，而且$10好抵食。依家商場岩岩開張，會有新張優惠，例如開張精美禮品、多款小食優惠(聽凝香園姨姨話逢星期三、六魚蛋燒賣有買一送一）、亦都有泊車優惠，自己揸車入去都唔使怕。