大少燒味茶餐廳

Open Now

Now Closed

經過呢間「大少燒味茶餐廳」好多次，見好多人喺門口等外賣，所以上星期我都去果度買燒味返去加餸！喺大埔想食乳豬都比較麻煩，通常都要至少要訂半隻，但見呢度有例牌，所以試吓！一打開已經好吸引，因為望落無肥膏。一咬落去「索」一聲，真係好香脆！盒內裝咗2層，其他燒味店通常面果層又靚又脆，壓住果層就比唔靚唔脆嘅，但大少嘅真係2層都香脆，下次再想食乳豬會返轉頭去呢度買。另外，再買咗盒叉燒，屬於比較瘦嘅部分，入口都惹味，如果蜜汁再多少少更佳。店員介紹我食「大少潛艇」，話係類似熱狗嘅包，見個名咁得意，叫咗個試吓。返到屋企打開，真係一個熱狗嚟，但內裏夾嘅唔係腸，而係叉燒！！個包哄過暖暖地幾香同煙韌，內裏夾住叉燒、芝士同煎蛋，大大件，份量好足，幾特別，味道都不錯，女士 lunch time 食一個已經夠飽。