新仙清湯腩咖哩專門店 (Closed)

做咗成日嘢，全日只係食咗一個早餐，到暈！一收工就即刻搵嘢食！途經哩間清湯腩，見到門口貼住連續幾年米芝蓮得獎就入去試下佢到底係龍與鳳！咖哩牛腩飯，咖哩汁係比平時食開果啲深色，而且係辣中帶少甜，我食小辣，辣度剛剛好，再辣就食唔到，牛腩有牛味，而且幾腍，唔會極都吞唔到，果然係牛腩專門店！薯仔好粉好好味！我通常食咖哩飯比較著重係啲薯仔，好多時寧願少肉多薯，所以哩度嘅薯仔加分！平時食牛尾都係紅酒煨，哩度就用胡椒煨，牛尾好重胡椒味，exactly係胡椒豬肚湯果隻味，牛尾雖然煨得唔係超腍，但味道同口感仍然唔錯。麻辣雲吞，我揀咗小辣同麻辣醬分開上，小辣已經超辣，辣過咖哩飯！雲吞細細粒，一啖一粒，皮薄又滑，饀亦好鮮味，我反而覺得唔點麻辣醬就咁食仲鮮味！