麵麵 (Closed)

今日嚟咗彌敦道726搵食，晚飯時間通常都排長龍等電梯，好彩今日去一樓搵食，可以行上一層樓梯就到達呢間麵麵。呢度有晚市套餐，亦有主餐牌可以選擇。首先店員會給客人兩小杯魚湯，魚湯呈現奶白色，飲落非常鮮甜，完全唔會覺得有腥味。極上魚宴料理，聽個名都覺得好豐富，有魚皮菜肉餃子、墨魚春卷、魚肉春卷、鮮蝦同魚蛋，每款食材都美味可口，魚湯鮮甜，魚烏冬同平時食開嘅烏冬唔同，比較上爽口，但亦不失煙韌感覺。另外點咗脆烤雞扒濃魚湯魚麵，雞扒好大塊，香脆得來又唔油膩，魚麵比魚烏冬較幼細，口感就更爽口，有啲似蒟蒻嘅口感。小食方面，睇餐牌見到有一道菜叫做「蝦兵蟹將」，於是就點了一客，其實係類似炸蝦餅，肉質彈牙，配合沙律醬同魚籽一齊食都唔錯。另外我哋點咗一份流心芝士墨魚波，佢係用墨魚滑包住芝士再炸，所以芝士有爆漿嘅效果。呢度轉特飲一啲都唔貴，所以我哋就點咗薄荷朱古力咖啡同埋海鹽焦糖咖啡，一冷一熱，各有特色，兩杯我都覺得推介。