Parkview (新都會廣場) (Closed)

今日同老朋友篤完波之後，喺葵芳諗住搵嘢食，話說新都會廣場嘅地下正中央都有一間大型嘅餐廳，易左手之後我就冇再試過喇，反正唔使等就試下啦。餐廳嘅環境都係開放式，算係葵芳區比較特色嘅餐廳啦。午餐埋單平均超過100，如果食扒就再貴啲，抵唔抵食就見仁見智喇。套餐都會包餐湯同餐包飲品。餐包熱辣辣，而且都鬆軟嘅，都幾有誠意。餐湯係羅宋湯，飲落有啲粉粉地，我個人就麻麻地呢種口感喇。朋友叫咗個煙熏牛胸肉蕃茄沙律。其實我都對呢個幾有興趣，不過佢冇得跟飯同意粉，吸引力就減咗啲喇。牛肉食落非常鮮嫩同有肉汁，係幾唔錯嘅。英式早餐。作為一個一嚿水起跳嘅早晨全餐，好似略嫌失色左啲，首先係普通嘅煎蛋，仲要得一隻，比較吸引嘅就係條牛仔腸，食落都係香脆嘅，但綽頭嘢如煙三文魚同埋漢堡扒等都係冇嘅，其他嘅配菜都係比較一般。凍飲就係自己落糖落嚟嘅，我叫佢凍咖啡都係正常水平。總結嘅係，如果大家嚟食，都係叫返佢嘅推薦菜會比較好啲。