Turkish Kebab (Closed)

來來來來來。來來哥一向鍾意幫襯細舖頭，勝在味道有保證，又有人情味。香港食土耳其菜既地方唔多，偶然見到Turkish Kebab搞團購，$188二人餐咁抵食，於是同女友去會一會佢。Book左枱，六點半去到，未有人幫襯，即時入座。餐廳裝修夠風味，醒一醒神。來來哥少食土耳其菜，問東問西，侍應姐姐都耐心解答，抵讚。好，上菜。紅扁豆湯，味道清新，有淡淡薄荷清香，醒一醒胃。沙律，來來哥大鄉里出城，上菜時同時放低兩枝醬，一白一橙，初時以為係沙律醬同千島醬，但原來係辣根醬，來來哥鍾意點白醬，橙醬偏辣。春卷，芝士餡，香口唔漏。主菜點左雞扒，同埋雜錦燒烤，燒得夠香味道又唔會濃太咸。值得一提係個飯，有少少似日本壽司飯咁甜甜地，濕濕地得黎又唔爛，雖然雜錦燒烤會乾少少，但配埋呢個飯就剛剛好。甜品，有雪糕同另一款唔記得係咩，有少少似椰汁西米咁，好味。仲有飲品，值得一提既係土耳其紅茶，細細杯，但茶味香濃，鍾意飲茶既要試一試啦。總結Turkish Kebab絕對係一間值得一試既餐廳，可能開左冇耐，地點又唔算好方便，未係好多人幫襯，所以來來哥黎個推介，希望好味道可以傳到八方。