常得館湖南米線

Open Now

Now Closed

行到一半街突然落起大雨，去附近食店避下雨兼食個下午茶先。原來建業街間常得館搬咗過嚟西菁街，餐牌冇變喎，好掛住佢哋個湯底，今日就食佢啦。⭐湖南麻辣牛肉米線朋友叫咗麻辣牛肉米線，店主話佢哋嘅湖南米線係正宗煮法，不過牛肉就改咗做港版，切大舊啲同埋份量多啲，仲話啲牛肉用咗四十幾種香料嚟煮，色香味俱全。朋友第一次食就大讚好味，啲牛肉勁正喎，湯底辣中帶鮮，好味到湯都飲晒🤤⭐自製泡椒肥腸米線自己就叫咗肥腸米線，呢款個湯底用咗泡椒，啲泡椒都係店家自己浸嘅。叫小辣我覺得啱啱好，雖然湯面見到好多辣椒油，但其實唔算辣，而且加咗泡椒辣中帶酸更香口，仲有啲花椒子有少少麻味添。店主話啲肥腸每日新鮮由上水屠房運黎，食落香口肥美有咬口，係正喎😍⭐紅油抄手仲叫咗份店家推介嘅紅油抄手，呢款湯底又唔同上面兩種，鹹鮮中帶酸辣，都好好味。抄手皮滑肉鮮，滑捋捋嘅口感好正啊😋⭐凍檸茶 & 凍奶茶食辣嘢都係要整返杯凍飲嘅，跟餐可以用優惠價加奶茶咖啡、汽水或者王老吉，凍飲大大杯茶底濃，不過我覺得叫少甜都係甜咗啲，下次都係要走甜啦，哈哈。明明係諗住入嚟食過下午茶避下雨，點解最後食咗咁多嘢嘅😳不過又真係好好味，全部都冇介紹錯。