摩登堂 (荃灣廣場) (Closed)

朋友知我鐘意食泰國菜，係荃灣廣場搵左呢間坐得非常舒適嘅泰國餐廳。餐廳提供好多種類嘅泰式料理，睇到我都心大心細，樣樣都想試。佢窗邊仲有卡位，真係夠晒闊落，約朋友見面食飯就啱晒。點左以下幾款食物：沙嗲豬肉串燒需要至少order三串，醬汁好惹味，咬到粒粒花生，豬肉串燒啖啖肉又燒得夠香。青咖哩雞肉用個金色煲仔裝住，幾有泰國氣息，又俾個熱爐熱住食，唔會變凍令到啲咖哩變到結撻撻，讚！再點左油酥餅搭配，沾滿微辣青咖喱汁，咬落少少脆口，香濃好滋味！曼谷蟹肉蟹黃炒飯份量十足，非常吸睛，材料豐富，炒得非常乾身香口，加埋蟹肉同蟹黃，啖啖唔同口感味道，唔會太咸太油，好食！點杯芒果糯米飯雪糕作甜品畫個完美句號，雪糕非常香甜，好味道；芒果又係甜，仲有芒果嘅清香；伴有少少糯米飯暖暖地，食落去夠煙靭，連甜品都係咁令人滿意！