正宗上海生煎皇后麵館 (Closed)

先幾個月食過屋企附近新開果間正宗上海生煎皇，今日嚟到深水埗，試埋呢間開咗冇耐嘅堅信號正宗上海生煎皇后麵館。舖頭喺兩間豬潤麵夾住，粉紅光管招牌，好搶鏡😎舖頭白色為主，配上小盆栽，特色黑白花地磚，份外清新。仲有老闆娘大大幅相做生招牌，幾賞心悅目😙見到有招牌皇后湯麵，毫不猶豫揀咗。有香橙豬軟骨，蓮藕，花膠，冬菇，秋葵，雲耳。 豬軟骨炆得夠淋，好入味，加埋啲橙皮喺面，增加咬口。 平民麵館都有花膠，真心覺得抵，補充骨膠原呀! 仲有其他配菜都好出色。不得不提佢個湯，飲得出無味精，好清甜，原來個湯用豬腳，豬骨，豬皮，黃豆等等材料熬製超過二十個鐘，唔怪之得咁正 ，我差唔多將碗湯飲曬🤣仲叫咗孜然豚肉串，一碟兩串，孜然可以去汗除濕，好香茴香，八角，桂皮味，味道芳香，濃烈。豚肉串外脆內嫩仲叫咗杯熱嘅紅豆低糖豆漿，加上紅豆，唔使齋飲豆漿咁悶，啲紅豆煲到好諗喎生煎皇同生煎皇后各有地盤，期待佢地嘅生煎皇子，生煎公主嘅舖頭