慶記 (Closed)

大角咀其實好多美食，最近仲起咗幾棟新樓，所以多咗好多餐廳進駐。因為行到太熱，見到呢度難得有得揀冷麵，二話不說入去試試。我地每人叫咗碗撈麵加兩個小食，價錢都幾親民，味道仲幾驚喜！「麻辣擔擔撈麵」花生同麻醬味超香，醬汁帶點稠身，令到每條麵都掛滿醬汁，越食越麻，好惹味，辣度屬於小辣偏中嘅程度。「特色山葵醬雞絲冷麵」超驚喜！本身自己係青瓜同wasabi控，上菜見到大量嘅青瓜絲真係好開心，食落真係有陣陣嘅wasabi味，再帶少少甜味，所以唔會係嗆鼻果種，食落好夾好清新。加埋嫩滑嘅雞肉撈埋一齊食，感覺好豐富，熱辣辣食碗冷麵，比起食湯麵，真係舒服好多。「生煎胡椒包」一定要試！但呢個上菜有少少耐，試咗就知點解，咬落去真係超脆，脆得黎入面仲要好多湯，同埋舊肉真係好重胡椒味，都幾辣！如果食唔到辣，記得揀返普通生煎包，好正！「xo醬蟹肉小籠包」睇相都見到入面又係好多湯，皮仲要好薄，食落有啲xo醬同蟹肉味，辣辣地，幾過癮！