大埔煮廚

Open Now

Now Closed

黎到大埔熟食中心搵食，我諗大部分人都會食麵啦！因為我唔係住大埔，唔熟呢度有咩食，所以我成層行左一轉，睇晒有咩食先揀。見到一間餐牌寫得好清楚食物同價錢，而且價錢非常公道，我就決定試一試佢。前言講完，入正題。我地叫左一個常餐：五香肉可午餐肉米粉，配奶油脆豬，黑松露炒蛋，熱杏仁霜。全部食物飲品味道都好正常茶記咁，我諗黑松露炒蛋出現喺茶記應該比較少見。個炒蛋ok 上面放左成一茶匙嘅黑松露，$39 呢個價錢都唔錯。杏仁霜都係正常，本人對杏仁霜有份執著，宜家好少茶餐廳沖得好飲，有d 直程沖到好淡，有d 就會沖到好杰，我嘅標準係當杯杏仁霜有少少凍時，面頭會結左一層薄薄嘅奶膜，為之濃杰適中。另一個叫左一份下午茶餐：炸魚柳薯條，熱奶茶，估唔到茶記都會擺盤咁用心佢將兩塊魚柳疊上薯條上面，放喺一隻白色大圓碟，旁邊用茄汁同沙律醬簡單地點綴一下。魚柳炸得香脆粉唔厚，但肉質偏淋，薯條係粗條，都唔錯。