Video
Read full review
2019-01-22
462 views
好耐冇同班朋友仔聚會，有時都想搵一日收工輕輕鬆鬆同啲朋友一齊食下飯，傾下偈、玩下board game咁。最方便就當然係去cafe啦，有齊食物同埋board game玩，仲可以舒舒服服咁樣坐。今次朋友提議去到旺角金雞廣場樓上嘅to-gather cafe， 環境都算唔錯，而且唔會太嘈，最適合同班朋友一齊聚會。而且最緊要嘅係board game嘅款式都唔少， 想玩乜都得。不過玩board game之前，就梗係要食啲嘢醫下肚啦，收工真係好肚餓，我哋一行六個人。叫party set似乎比較抵，又有小食又有主菜，仲包埋任飲嘅特色飲品，可以邊食邊玩！先來兩款特色飲品，分別係芒果梳打(芒亨)同埋柑桔檸檬， 一大壺咁上， 可以按自己嘅份量去斟， 同埋味道都唔錯，尤其係柑桔檸檬，酸酸甜甜咁 ，一邊食一邊都飲咗唔少。先來一個田園沙律配胡麻汁， 望落都幾豐富，有蕃茄、粟米、青瓜同沙律菜等等， 食落都幾清新開胃。跟住嚟嘅就係即炸嘅芝士忌廉汁薯條， 同佢個名一樣真係冇得輸，除咗夠曬香脆之外，個忌廉汁都幾香濃， 非常惹味！然後仲有雞肉串燒同埋豬頸肉，雞肉嘅味道唔錯，有少少碳燒味，而豬頸肉加埋秘製嘅泰式酸汁都幾好食
最方便就當然係去cafe啦，有齊食物同埋board game玩，仲可以舒舒服服咁樣坐。
今次朋友提議去到旺角金雞廣場樓上嘅to-gather cafe， 環境都算唔錯，而且唔會太嘈，最適合同班朋友一齊聚會。
而且最緊要嘅係board game嘅款式都唔少， 想玩乜都得。
不過玩board game之前，就梗係要食啲嘢醫下肚啦，收工真係好肚餓，我哋一行六個人。叫party set似乎比較抵，又有小食又有主菜，仲包埋任飲嘅特色飲品，可以邊食邊玩！
先來兩款特色飲品，分別係芒果梳打(芒亨)同埋柑桔檸檬， 一大壺咁上， 可以按自己嘅份量去斟， 同埋味道都唔錯，尤其係柑桔檸檬，酸酸甜甜咁 ，一邊食一邊都飲咗唔少。
先來一個田園沙律配胡麻汁， 望落都幾豐富，有蕃茄、粟米、青瓜同沙律菜等等， 食落都幾清新開胃。
跟住嚟嘅就係即炸嘅芝士忌廉汁薯條， 同佢個名一樣真係冇得輸，除咗夠曬香脆之外，個忌廉汁都幾香濃， 非常惹味！
然後仲有雞肉串燒同埋豬頸肉，雞肉嘅味道唔錯，有少少碳燒味，而豬頸肉加埋秘製嘅泰式酸汁都幾好食， 食落啲豬頸肉都幾juicy！
之後就係炸物出場嘅時間，分別有泰式魚餅、吉列蝦、咖哩角同埋蜜糖雞翼， 款款都炸得好香口，尤其是我最鍾意嘅蜜糖雞翼，炸得香脆之餘，仲有肉汁，加埋甜甜地嘅蜜糖，忍唔住食多咗幾隻。
而朋友就比較鍾意吉列炸蝦，上面淋咗少少嘅日式醬汁， 個粉唔會太厚， 味道都唔錯。
食咗咁多熱氣嘢，都係時候食番啲菜 ，而呢一個芝士焗蔬菜入面都幾豐富， 有西蘭花、粟米、甘筍等等， 芝士汁同埋西蘭花嘅味道好夾，不過甘筍就略嫌硬咗少少， 如果可以煮淋少少就更好。
主菜方面我哋就叫咗鮮茄焗豬扒飯，同黑松露海鮮意大利飯。 一紅一白嘅兩個配搭，我就比較鍾意食鮮茄焗豬扒飯，因為豬扒煎得香脆，底下嘅飯仲有炒過，食落好香口，而且加埋茄汁真係好啱送飯。
但朋友就鍾意呢一個黑松露海鮮意大利飯，因為佢嘅海鮮真係好豐富，除咗表面睇到嘅大蝦、鮮魷、青口之外，底下嘅意大利飯仲加入咗 雜菌同埋蜆肉，撈埋一齊，食落好豐富好多層次，而且仲好香黑松露味。
每人都係百六蚊左右，對比唔少cafe嚟講，呢個價錢都算抵食，而且仲食咗咁多款食物，亦都有埋board game可以玩， 下次都可以考慮再約朋友嚟呢度！
Post
