芯 (Closed)

好耐冇出去食飯，難得夜晚唔使返工梗係出去chill下。呢間嘢輕食為主，都係俾人食下小食飲吓嘢傾吓計。所以我地都係叫啲小食為主。好似呢位唐揚炸雞真係不得了。一切開真係超juicy，啲雞仲係好嫩滑，再配埋呢個蜜糖芥末醬，真係超正。食日本嘢當然唔少得食軟殼蟹，佢呢間嘅軟殼蟹睇落好似大隻好多。睇返佢個橫切面真係好厚，唔會炸到乾晒，送酒真係一流。另外我仲試咗佢嘅鰻魚壽司同埋火炙三文魚壽司，佢啲壽司好似圓轆轆咁好得意，原來圓轆轆嘅原因係因為中間都仲包住左一舊鰻魚。另外我哋試咗佢嘅八爪魚大阪燒，不過八爪魚就唔係太多粒，如果多啲嘅話仲好食。之後仲試咗佢嘅刺身拼盤，佢有四款每樣兩件，牡丹蝦真係好大隻，淨係食隻蝦都飽左一半。最後仲試埋佢一個好特別嘅菜式，叫帶子刈包。佢係用帶子夾住一隻牡丹蝦再加埋海膽，成個口感好豐富，再點埋用牡丹蝦頭淆出嚟嘅蝦汁，真係蝦味濃郁。佢而家嘅生啤做緊優惠，一杯都係$38。而我自己就揀咗佢哋嘅sake-白鶴大吟釀。佢呢個sake樽都好細心，個樽中間有個窿俾你擺冰，咁做可以凍住啲酒，又唔會令到啲冰融完溝淡晒。