真味鮮廚 (Closed)

偶爾放題式打邊爐，感覺好減壓，唔洗諗，想食就叫。當然啦咁就要去間有質素既，今晚去左真味鮮廚。一坐低就有惹味嘅雞煲開胃，侍應好好幫我地搞，確保唔痴底，雞件大大件，好肉地，叫左小辣，煲耐d洋蔥夠淋又甜，如果唔夠食重可以再添食。之後上埋刺身拼盤，有甜蝦、帶子、三文魚腩、鮑魚、八爪魚等，擺盤靚靚，而且三文魚腩特別厚肉。湯底有胡椒蘿蔔排骨湯，夠胡椒味但又唔會好辣，而且大大件豬骨，好足料。今晚好D既我地當然揀左龍蝦啦，龍蝦勁新鮮，上枱時重見到d肉彈下彈下，烚5分鐘，啱啱好，咩都唔洗點，鮮味已經夠晒。另外蟶子又係一贊，大大隻，長過我手掌有多，肉厚彈牙。魚類有脆肉鯇和龍躉肉，龍躉肉質實淨，唔會烚兩下就散，證明好新鮮。海鮮拼盤重有海蝦、青口、帶子、蜆等。打邊爐另一主角，特級安格斯肥牛，有牛味，而且雪花分布均勻，有油香但唔油膩。另外火鍋必食有大大粒好足料既水餃，滿滿既蝦肉、木耳…正～之後重叫左蝦滑、冰豆腐、新淮山、炸魚皮，數之不盡。飲品任飲，啤酒、汽水、烏龍茶咩都有得飲，重有百香果汁，總有一款啱飲，而且自助區重有幾款頭盤小食。