萬丸燒肉 (Closed)

位於銅鑼灣嘅日本燒肉餐廳，聽店員講本身係做高級日本單點燒肉，雖然而家親民啲做咗放題認識，但係佢肉類嘅質素一啲都冇低到，性價比非常之高！講下佢地主打嘅牛肉先！有安格斯封門柳、安格斯肩胛脊肉、安格斯翼板肉、美國牛仔骨、壽喜燒汁封門柳等等。個人幾鍾意佢嘅香蔥薄牛舌同秘製牛肋條，牛舌雖然薄身，但燒完之後有入口即溶嘅感覺。牛肋條唔會食到有筋，好有咬口。其他肉類方面，日本豚五花肉、豚肩肉、美國極黑豬頸肉、豚肉眼、雞腿肉等等，亦都有雞皮、雞腎串同羊腩排，除咗牛肉之外，豬肉雞肉同羊肉都有得食，好少放題嘅會做到咁多種選擇。個人最推介雞皮同雞腎串，平時出去居酒屋要食一串都幾十蚊，而且仲可以根據返自己平時鍾意嘅生熟程度去燒！除咗高質嘅肉類之外，呢度嘅小食沙律都好出色，一啲都唔馬虎。海苔薯條會令人一啖接一啖咁食，唔會過咸。唐揚雞軟骨同唐揚炸一口豆腐比較香口嘅小食，唔會好油膩，份量適中。枝豆可以幫助解膩，味道適中。玉子燒偏甜，中和返燒肉嘅飽滯感。