極尚大喜屋 (加連威老道) (Closed)

好耐冇去食放題，女朋友又唔係食得好多嘢，所以放題得黎都要揀間食靚嘢食嘅先得。極尚大喜屋就係我哋嘅首選。呢度永遠都係座無虛席，今日雖然係禮拜一，但係一早條排隊嘅人龍已經喺馬路旁邊默默靜候咁等緊入座。職員都盡快幫我地安排入座，雖然兩個人，但佢好好咁俾咗張四人枱我哋，可能睇得出我一副大食樣特登比張大啲嘅枱我放食物🥰。一坐低二話不說就立即動手，每一張都點左好多唔同嘅食物。等左冇幾耐啲嘢食就陸陸續續咁上台。首先係個刺身拼盤，帶子、赤貝、甜蝦、北寄貝、象拔蚌等等，食材選料不俗，味道鮮甜。例如有時出面食赤貝會有啲腥味，但呢度嘅完全唔會，仲爽口鮮甜，分外美味。蒲燒鰻魚肉厚鬆軟，而且醬汁調味剛好，令人忍唔住再帶多2round。炒珊瑚蚌有意外驚喜，估唔到食放題嘅地方嘅小炒都如此爽口美味，蒜蓉帶出珊瑚蚌嘅鮮甜，值得一試。海膽軍艦用料十足，海膽連同海水鹹味喺口腔裏面徘徊，以放題來講呢度嘅份量真係超多。再嚟就係炙燒左口魚壽司，左口魚燒過嘅情況之下魚油溢出，滋潤壽司上嘅飯粒，更顯油香。最後每人都有一杯雪糕，呢期嘅限定就係Tiramisu，點可以唔試下佢呢。總括嚟講食放題首先梗係極尚大吉屋啦。