canton pot (Closed)

同朋友聚會最鐘意揀打邊爐，而今次聚會就揀左個靜啲地方，係薈賢居2樓～座位都好舒服，平日嘅日子都座無虛席就代表都相當多粉絲。一坐低就聞到隔離枱川芎白芷魚頭鍋嘅香氣，就忍唔住嗌左個套餐，入面有美國手切雪花牛、和牛粒、海蝦、墨魚丸、貢丸、芋絲仲有好多蔬菜等等。鍋分左兩邊但都係同樣嘅湯底，兩邊都有個大魚頭，好足秤！魚頭入面好多肉，煎過所以好香！一開始店員先盛左一杯湯頭比我地試，川芎白芷嘅味道都好出，之後愈滾愈濃郁飲更正！套餐入面仲有個生麵，本身已經食到飽但竟然仲會想食，啲麵吸收晒湯底嘅精華。飲品嗌左一樽紫貝天葵，估唔到超濃郁好好飲，多人分享都好足夠！打邊爐必嗌本地手切牛頸脊，牛味重肉質又剛好！食肉獸要再點一個雜肉拼盤，入面有齊澳洲手切M5級和牛肉眼、黑豚肉、雪花羊肉片，咁就可以試晒全部肉，牛肉都厚同大塊～餃子揀左羊肚菌豚肉餃，款式比較特別，仲幾健康。甜品嗌左楊枝甘露水滴同川貝陳皮雪耳燉津梨，兩款甜品都好出色，楊枝甘露水滴製作比較新穎，燉津梨好滋潤作結剛剛好。