雲來客棧 (Closed)

幾個女仔都鐘意gimmick嘢，上網見到呢間野，咦有得玩古裝，扮下啲郡主呀娘娘咁，好似幾有趣，所以就想黎呢度，食物都係其次。等位都等咗好耐下，啲朋友都等到有少少唔太耐煩，好不容易先到我們可以入去。裝修環境真係好古代下，有啲木枱木屏風咁，又有啲古代酒樽，叫侍應啲時爭啲想叫小二😂，其實真係可以諗下喎，好似啲女僕cafe咁做戲做全套，叫啲侍應著晒小二衫，叫客人做客官！首先黎到嘅係小食瑞士雞翼，呢道菜就比較快上菜嘅，雞翼好大隻兼調味絕不輕手，啖啖肉。食完小食試下衫，我勸大家斯文啲，因為好多已經爛爛地，要顧及別人感受先得，太粗糙人地無得試架啦。我嗰frd 揀左套皇后衫黎試，都幾好睇，不過有啲人唔識野以為嗰件係少數民族衫，我笑而不語。影完相少不了點心，糯米雞恐怕係港人最愛頭幾位，唔知喺古代叫咩名呢，足料，好大隻，味道就正常糯米雞咁啦。然後就叫左個好ig-able嘅麻雀型椰汁糕嚟做甜品，好像真，枱枱都有叫，搞到我都想開枱。今晚撞正警鐘誤鳴，原來古時候已經有警鐘啦，哈哈。好評係俾個著古裝gimmick嘅，有得食又有得玩，我地都影得幾開心，食物就正常啦。