快靚正燒味粉麵茶餐廳 (Closed)

唔係家庭聚會都未必咁齊人，為左同班親戚聯誼，媽子竟然話要親自下廚招呼佢地，但點知最後都係揾着我黎搞。臨時臨急唯有斬料加餸應付班大帝。快靚正名副其實真係快靚正，由落單到拎走前後都唔使５分鐘。味道仲好唔錯呢。店面同普通燒味店大同小異，但左右分開為堂食同外賣。燒鴨燒鵝滴晒油咁，真係十分吸引。眼見師傅手起刀落斬斬斬，不消一會就將各式各樣燒肉／叉燒／雞鴨斬好切好。所有燒味放晒係師傅面前，揀要邊樣就即刻取下切件。最緊要就係快！燒鵝。半隻燒鵝油脂充足，雖然拎到返屋企有少少腍，但放入焗爐加熱返，香味依然。肉質結實羶味唔會太勁，沾上冰梅醬以酸甜味道中和油膩感，真係好食。油雞AND切雞。因應大家口味各要左半隻，兩樣都好嫩滑。就算雞胸都唔會好柴，尤其係油雞上色均勻，偏甜嘅醬油味道比蔥油更惹味。叉燒。有瘦叉同半肥瘦叉混合，呢樣係大家都讚不絕口嘅一道。因為燒得香口之餘帶少少燶邊，肉質腍中帶咬勁絕無鬆肉粉腌製嘅可能。單單配上一碗熱騰騰嘅白飯已經滋味十足，咸甜適中嘅蜜汁更加係撈飯之選。小小的一餐斬料加餸，令到大家都食得好滿足，今次媽子又係班親朋戚友面前攞晒分了。