餃餃餃子 (Closed)

香港人個個好忙，食個飯都好趕，而且放飯時間只有一個鐘，於是約同事食個快飯。係灣仔一到食飯時間，度度爆人，好辛苦先逼到入餃餃餃子。係開放式廚房，效率好高好快。事不宜遲，叫左個鹽麴新鮮椰菜，椰菜固之然新鮮爽甜，加上發酵鹽麴味道好有層次，唔係單純既咸，鹽麴比鹽淡而且有回甘既感覺，令椰菜更加鮮甜爆汁，好開胃又好食。到主角餃子上場，未開動前，有簡介教點食，於是裝左餃子汁同味噌醬汁用來點。椰菜豚肉餃子唔係單純得肉，椰菜中和左肥膩感，仲有好多汁，而且外皮酥脆。蟹肉海老特長豪華餃子棒，配上沙律醬，感覺一般，不過其他餐廳比較少見。驚喜位竟然係Puri Puri海老餃子，蝦好彈牙同爽脆，完全冇雪藏味，點上紫菜海鹽已經好入味，正。由於唔夠飽，夾份叫左個鰻魚飯，個塊鰻魚好肥美，粒粒分明飽滿，加上蛋花增加美感同味覺，好飽肚。最後飲上一杯柚子梳打清一清個口，即時感覺精神抖擻，成個人好清新。