來多碗車仔麵 (路德圍) (Closed)

陪阿女打完劍，今日要過荃灣比d野朋友，順便係附近食埋晩餐先。原來呢邊好多選擇，今日成日都落大雨，周圍都唔多人，阿女話想食車仔麵，就黎左呢間來多碗車仔麵，好彩有位。點餸既方式係舊式既方法，企係d餸面前想食咩就點，而家好多都係用紙去點餸，喜歡舊式呢種環保方式。我點左四餸一米線，有魚旦，豬腸，蘿白，溏心蛋；豬腸唔肥又淋，滷水汁好入味，同兒時食既味道係一樣架；魚旦帶有咖哩味，唔算辣但好香既咖哩味，又彈牙，唔錯；蘿白清甜無渣；溏心蛋好軟，蛋黃淋淋好香蛋味；米線好滑而份量勁多（無加底都食唔哂）。辣醬分兩種有秘制＆魔鬼，我揀左秘制辣醬，少辣帶甜，阿女試過都好喜歡。阿女話比少少米線佢，佢浄係叫餸，佢一點就點左6個餸，有雞翼，豬手，豬腸，紅腸，蘿白，蟹柳，可能佢做完運動，佢全部食哂但佢話好飽，佢仲食左半隻蛋加一粒魚旦。阿女最喜歡既係豬手，我試過的確好好味，淋得黎爽口，滷水汁入味；同樣地雞翼又係好味，因為個滷水好得!店內唔算大，得三十個座位，但坐得舒服，新式裝修仲有卡位，而最重要既係車仔麵既味道係舊式風味!下次行開荃灣，又多間選擇啦！