越男仔 (Closed)

放工約左同事去行街，諗住普通食碗粉就去血拼，見登龍街新開左一間叫越男仔嘅餐廳，見個名幾得意我地就二話不說咁入咗去試！店入面有分普通枱、卡位同Bar枱三種，設計都幾新穎！食物方面有粉麵、小食、飲品同好似車仔麵咁自由配搭，都算幾多選擇！越式火車頭湯河粉配料有生牛肉、牛丸、牛筋、牛栢葉、烤牛肉，份量好足，湯底好清甜嘅牛肉味！牛筋同牛栢葉都好爽口彈牙，生牛肉同烤牛肉都好淋身，有牛肉香味，值得下次再食！胡志明市紅蕃茄四寶湯檬粉四寶有有扎肉、豬扒、豬頸肉、脆豬肉，蕃茄湯底好甜好fresh，唔會有好油嘅感覺！由於同事係蕃茄迷，佢竟然可以連湯都飲晒！越式蝦餅粉麵加套餐價可以配小食！蝦餅又脆又爽口，旁邊有酸羅白絲配埋入口去油膩！招牌原隻軟殼蟹同事係蟹迷所以見到即想試！做法似風沙炒蟹咁，蟹上面有炸脆嘅蒜粒，軟殼蟹脆脆地有牛油味好香口！三檸七喜同利賓納青檸梳打，最特別嘅三檸係青檸、咸檸同新鮮檸檬做成，好fresh~