波記粉麵茶餐廳

Open Now

Now Closed

去完銀行已經 13:45 喇，剩返 15 分鐘食飯，剛好見到對面開左間新麵檔喎，波記，茶餐廳，去試試啦﹗附近好食既潮州粉麵都執晒笠，希望依間唔會今我失望啦 ﹗好采有位坐，環境免免強強合格。感覺上好混亂，由帶位、寫單、入單、傳菜到埋單都非常唔順暢，樓面阿姐同收銀都好生手呢。牛什麵走蔥，因時間關係唔可以諗太耐，求其快黎碗麵先。飲啖湯、食啖麵，好味喎 ﹗好過香港仔好好。唔洗再幫襯難食又貴又頸渴既香港仔魚蛋喇，但要行遠少少。牛什又腍又入味，牛膀夠棉又嚥韌、腸內嫩外彈、金錢肚爽爽爽。湯底香甜濃郁，麵質爽彈無得頂啦！無投訴。當然要試試自家辣椒油啦，無辣不歡既我辣椒油先係主菜。深啡色既辣椒油睇落平平無奇，但咁鬼辣既？激辣，辣到我額頭背脊都飈晒汗。我要每啖麵都有辣椒渣一齊送入口食架，咁先夠嘆麻！。蠔油唐生菜，菜葉唔夠嫩，有點韌同粗糙又唔夠鮮甜囉，一般。