地茂館甜品

Open Now

Now Closed

九龍城食過幾次中式糖水都冇咩好感，醒起朋友話過地茂館既楊枝金露唔錯，睇完其他食評見出品都幾靚仔，就行幾個街口黎試下啦。入到門口見幾個人由收銀處開始排隊，由於入口只有一個身位，不其然隨後企左一陣先發現係排緊隊入座，等左幾分鐘先有位。生磨芝麻糊 ($23) 加芝麻湯圓 (+$7)近乎滿瀉既表面張力最令人心猿意馬，標榜生磨既芝麻糊並冇令我失望，幼滑得黎仲食到黑芝麻幼粒，濃稠唔似芡，而係有如whipping cream發起後既層層疊狀態。可惜甜度同香度都爭少少，係芝麻湯圓餡料既映襯下，更加顯得索然無味。蛋白燉鮮奶 ($25)水潤嫩滑如蒸水蛋，同傳統燉鮮奶相比的確較易入口，但蛋味奶味都淡到好似維他奶咁，唔太夠喉。由menu既字體同碗碟既設計都有種新派既感覺，環境幾光猛，但繁忙時間要坐一邊卡位。整體而言都係水準以上，係九龍城呢個中式糖水沙漠，下次黎食泰菜都有機會再訪。