明珠閣 (Closed)

團年飯級別的晚餐，黎到平時唔會去既餐廳食番餐。(可能個名吸引唔到我)不過食完覺得算唔錯。一行五人，點左一個四人餐，另散叫幾款菜式。四人餐有八款野食，加埋其餘點叫夾埋超過十款，好豐富呀哈哈。三小碟之一，味道帶麻辣同醋既木耳，算不上特別但幾開胃。鐵板上既叉燒，口感幾特別，肉質較稔，但冇燒味個款咁既脆口。脆皮牛腩，牛腩老同實左啲，外皮係炸皮個種脆皮，係脆但覺得整體口感唔算好夾。炒蛋滑，帶子彈，黑松露香，黑松露有融入落蛋入面，幾好！鮑魚係正常口味，較難得係配角既冬菇，菜都冇失禮！西蘭花用xo醬炒，味道唔會差，雖然大棵既花，但唔覺得老。小籠包有唔少湯汁，肉汁甜，外皮稍為厚了少少乾了少少，但整體還可以。炒飯有薑粒，香口，一啲都唔油，但可能就係少左啲油，未去到粒粒飯分明，有部份會黏住。雲吞雞唔錯，菜，雞，雲吞，湯都係好味既。個名好奇妙，望落就似小學中學開party既小食，有鴨胸，蛋，青瓜，沙律醬同薯片(係底)，食落係幾好但咁既價錢計性價比唔高。煎餃幾出色，肉汁會爆出黎，外皮略脆唔燶唔乾。甜品簡簡單單，好食，唔會太甜，唔係吉落去就散既。餐廳環境不錯，食得舒服，多人聚餐既一個好選擇。