木子園 (Closed)

呢間中菜館就係中環街市隔離 The L Place 。如果你行過門口，已經有好靚既吊椅打咭位，裡面有花花樹，裝修又精綴，睇埋 bar 枱位，真係估唔到係食中菜。醉雞，酸菜魚，小籠包，多款新派川菜比你揀，真係唔係淨係得打咭。灌湯小籠包 $98多汁飽滿，湯汁清甜，六件小籠包開心過得四件。紹興酒糟醉雞 $88醉雞係幾有驚喜，雞肉鮮嫩，散發出紹興酒香，心醉人不醉。酸菜魚 $288酸菜魚上枱大得很，唔係淨係隻碟巨型，份量都唔講得少。除咗大量鮮嫩魚肉，最驚喜係大量幼薯粉，仲有豆卜，腐皮，雲耳等配料，二人食都夠做。而酸菜魚湯走金湯路線，酸，麻，辣平衡得幾好。聽聞佢有個午市半自助餐，有任食北京填鴨，應該好易回本。