和氣食堂 (黃大仙中心南館)

Open Now

Now Closed

相約友人響黃大仙中心見面，原來呢個商場都好多餐廳, 最後選擇左食呢間和氣食堂，和氣食堂屬於新派日式料理餐廳,食物品種多樣化。前菜 ～ 3點剌身盛C $108， 所有刺身都好新鮮，珍寶赤蝦刺身2隻, 大隻彈牙好鮮甜；三文魚刺身3片, 厚切甘香；帆立貝刺身1 隻，開邊有2片，嫩滑甜美。前菜 ～ 火焰左口魚邊牛油果沙律 $68，左口魚好少食，幾特別，沙律菜新鮮爽翠，夏天食一流，另外我好鍾意食牛油果，牛油果份最算多，正！千回火鳥3隻 $38，即係燒雞翼，雞翼燒到冇晒皮下脂肪，皮薄香脆，連埋皮食都唔會有罪惡感。金蒜燒日本米茄子 $42，茄子佈滿金蒜，好鬼死惹味，滿口蒜香味。白咖哩烏冬 $88，首先睇menu果陣已經決定食，造型相當吸引，白色泡泡表面睇落似忌廉，咖哩烏冬要由碗底挾起，烏龍彈牙，撈埋一齊食好好味，跟餐仲有兩舊炸雞球。櫻花蝦鯛魚湯泡飯 $108，魚湯用茶壺分開上，食果陣先倒，咁樣就唔會浸到d飯脹大，魚湯濃郁，好有魚味，有兩隻大蝦同帶子，配有米通粒，令泡飯更有口感。糯米慈紅豆宇治抹茶雪糕 $42，飯後點可以唔食番個甜品，雪糕香滑重奶味，糯米慈配紅豆一齊食，煙煙韌韌好得意。埋單 $543