MAZ Thai & BBQ (Closed)

提起泰菜，大家會即時諗起冬蔭功湯、菠蘿炒飯、海南雞飯等等經典菜式，呀……估唔到今日黎到呢度食泰菜，食到好多之前未食過既菜式，與其話係泰菜，我覺得更加似係fusion菜，真係幾有驚喜！首先係泰菜館食到生蠔都已經係一件好爆嘅事啦！有Smoky bay Tasmania同南非生蠔，$98半打，水準都可以媲美專食蠔既餐廳。塔斯馬蠔入口帶海水味，後帶甜味，肉質比較豐厚；而南非生蠔 口感Creamy，海水味唔重，鹹甜適中。最重要係唔腥，肉質肥美。呢度都幾多海鮮食，應該係佢地主打菜式，好似呢個自家製辣酒蒜蓉蝦，$166，蒜香中食到酸酸辣辣嘅味道，蝦肉幾鮮香，淺淺嘅辣味其實幾適合佐飯。既然海鮮咁強，唔爭在仲埋個泰式汁煮荷蘭新鮮藍青口，$266，新鮮、厚肉、較甜，用充滿泰式風味既汁去煮到入味，兩者互不搶味，仍然食得出藍青口嘅鮮甜。最後當然唔少得要有d澱粉質落肚先夠飽，如果唔係返到屋企咪要煮公仔麵？揀左D24榴薄餅，$66，焗完之後可以見到表面嘅芝士完全融化，而且聞到濃烈榴槤香味，拎上手即刻可以拉絲。香脆餅底可以中和返飽滯感，勁邪惡、勁好味！呢度嘅環境亦有別於一般泰菜館，整體上幾有新鮮感。