港味

Open Now

Now Closed

今日約咗位親友去油塘大本營食下午餐，佢介紹我和媽去間新開幾個月，而裝修唔似傳統酒樓嘅食店飲茶。門口攞飛，等咗大概十分鐘就有位，職員問我飲咩茶，我就話要普洱，估唔到係一人一個茶包，自己沖，我個人覺得比起舊式酒樓跟加好，因為感覺更加乾淨。我哋叫咗六樣嘢食。最快到嘅當然係冷盤，四喜烤麩，好開胃，底下仲有白蘿蔔，酸酸甜甜，唔錯！之後就等咗大約十分鐘，其他點心就陸續送到，有松露野菌餃、杞子棉花雞、蜜汁叉燒腸、蟹籽燒賣皇，以上所有點心都比預期中好食，而黑金流沙包嘅流沙唔會太甜，食咗竟然仲想再叫多個甜品試下，原本叫多個紅棗糕，可惜無哂，最後揀咗個紫心香芋丸，口感有啲似煎堆，好味又唔會太甜。總結：環境及食物都唔錯，職員服務態度親切有禮，收費合理，總共$178，接受現金、八達通、支付寶、微信支付或信用卡付款，非常方便。有機會我都會再去食多次😋。