點心瑪莉 (Closed)

屯市新開左「點心瑪莉」，仲要係吳若希做代言人，一於去試下。有幾款點心既樣都幾特別，例如：真係冬菇包、奶皇小豬包、瑪莉蜂巢燕窩蛋撻。「真係冬菇包」既外表成個冬菇咁，啡色既顏色係朱古力粉，整個係麵粉黎，內面既餡料係冬菇。呢個包真係好特別！「奶皇小豬包」外表成個豬仔咁，內面係奶皇，味道比傳統既淡左D，無咩特別。「瑪莉蜂巢燕窩蛋撻」就係一早整定，放左門口廚窗位，唔係熱辣辣，不過味道OK，細細隻，唔會太甜，有燕窩係面到。「鮑魚香菇燒賣」係餐牌既相片同實物完全係兩會事，相片就有隻鮑魚仔係個燒賣上面，而實物就只係有片鮑魚係燒賣上面，另外好似無香菇係內面，不過佢既味道OK既！「XO醬鱸魚扒腸粉」唔貴兼大件，唯一吊詭既地方係腸粉還腸粉，魚還魚，而XO醬真係好真材實料，有辣椒、乾瑤柱等。「香蔥胡椒包」非常大件，包內面有豬肉同胡椒醃埋既餡，好重胡椒味，都OK！小結，點心都不過不失，而價錢中規中矩，可以試試。