砂煲兄弟 (東港城) (Closed)

好耐冇食中菜，今日經過見到呢間沙煲兄弟裝修咁得意就入去試下！呢度主打係沙煲嘢，第一件事嗌個傳統嘅臘味煲仔飯試下先！佢哋啲煲仔飯有脆卜卜、金黃色嘅飯焦㗎， 證明佢嘅煲仔飯整得好成功。跟住嗌咗兩個小菜，一個牛仔骨一個三杯雞煲。牛仔骨好淋好入味，三杯雞啲雞都好滑，味道唔係好辣，偏甜。最啱我呢啲唔食得辣嘅人。呢度仲有個出面比較少見嘅蝦多士，多士上面搽咗彈牙嘅蝦膠，炸到脆卜卜。我哋仲嗌咗兩杯嘢飲 ，一杯紅豆冰同一杯龍眼蜜。紅豆冰同出面嘅唔同，佢係用奶茶做底，夠曬特別。食完飯正打算去下場食甜品之際，呢度竟然有埋甜品！我地嗌咗個新出嘅天使西多士同埋豆沙包，豆沙包入面嘅豆沙唔係好甜，啱啱好。佢炸到個皮外脆入面煙煙靭靭，好好食！下次嚟一定會再嗌呢個甜品。