大丸和風食堂 (Closed)

朋友在旺角附近返工，佢話lunch hour行過女人街，見到間日式餐廳門口寫住試業中，應該係新開，咁佢就話今晚不如食呢間啦。餐廳裡面都幾大，日系裝修，座位好寬闊，坐得好舒服。餐牌都幾多種類，樣樣都想食，最後我哋叫左個丼飯、拉麵同炸雞。和風炸雞：份量都幾多，雞剛炸起熱辣辣，脆口，佢上面仲唧左D沙律醬，食起上黎夠晒味道。特盛海鮮丼：刺身有三文魚、牡丹蝦、帶子、三文魚子同埋玉子，賣相吸引架。食材新鮮，食到刺身嘅鮮味。壽司飯加左少少醋，但又唔會太酸。另外叫丼飯都會跟一個味噌湯，味噌湯味道正常。值得一提就係，餐牌上寫可免費追加壽司飯，估唔到日式餐廳都會有白飯任裝。黑蒜油蝦拉麵：蝦幾大隻，蝦肉結實爽口，唔錯。拉麵口感煙韌，軟硬適中。黑蒜油味道幾香，整體湯底較濃味，都OK喎。