泰然 (長發廣場)

Open Now

Now Closed

同朋友原本一心入去青衣食日本菜，去到先知餐廳改左新面貌，變成泰國菜館，一場入到去一於都品味下先返屋企，我地兩個人點左4款食物同飲品，食物唔洗十分鐘就巳經到哂，勁快手。第一款食物：泰式串燒(半打)，我地選左豬和雞各3串，望落兩者分別唔大，我同朋友食落先估到，兩者肉質都比較實正，唔洗點醬食都巳經好入味，點下橙色既醬食味道就甜甜地。第二款食物：蝦醬炒通菜，放係枱上都不斷聞到蝦醬濃厚的味道，食落味道唔咸剛剛好，通菜口感鮮嫩滑溜。第三款食物：蟹肉炒粉絲(走芽菜)，粉絲用左芹菜、洋蔥、彩椒、蛋和蔥伴炒，炒得乾爽，唔硬，雖然蟹肉份量唔多，但粉絲內散發啖啖的蟹香味，惹味得黎都幾好味，食到底仲無咩油份，$68蚊碟都算抵食。第四款食物：生牛肉湯金邊粉，生牛肉片份量都幾大塊，除左牛肉片仲有幾嚿蘿蔔同一些雪菜，加埋炸蒜同洋蔥，令湯底顏色變得啡濃。飲品方面食泰國菜當然叫返兩款有泰式味道既飲品啦，我同朋友分別叫左個椰青同咸檸檬梳打飲，透心涼，爽哂，為今晚晚餐劃上句號。