海街丼 (E-Max) (Closed)

睇完戲見到有新開日本餐廳就黎試試，睇menu先發覺全部刺身丼基本上都有吞拿魚，因為本身自己好怕腥，除左係日本食過一次拖羅覺得好味之外，平時絕對唔會食吞拿魚，所以最後揀左廚師推介丼（拖羅+赤身+海膽），諗住貪佢唔係魚蓉可以夾哂比男友自己食海膽🤣上檯後店員介紹食法，首先有醋啫喱，飯本身冇落醋，可按自己個人喜好添加啫喱落飯到，因為試過有d鋪頭醋飯太酸，所以可以自己調較呢點幾好另外仲有樽魚湯，飯食剩三分一果陣可以加落去做茶漬飯，我自己就冇加，男友就好鍾意個湯重點嘅刺身望落去好新鮮好靚，夾哂所有吞拿魚去男友個碗後見拖羅咁靚仔就忍唔住夾返件諗住試下，試完後即刻係男友個碗夾返哂自己d拖羅😋拖羅好新鮮，好重魚油香但一d都唔腥，夾埋加左芝麻同蔥嘅飯一齊食更顯甘香鮮味，好味到平時唔食吞拿嘅我都不停讚！海膽亦好新鮮好甜，赤身我就都係冇食過但男友話都好好味員工都好有禮貌好友善，而且都有留意你有冇d咩需要，亦會主動加茶而價錢方面開頭睇menu都覺得有點高，晚餐刺身丼都係約200蚊，今次食呢個廚師推介丼就盛惠230蚊，但食完後會覺得食物質素係完全值呢個價錢，下次都會再黎！