新麻蒲 BBQ (波斯富街) (Closed)

宵夜時段好想食韓燒就搵到新麻蒲BBQ，入到去都差唔多last order，咁就快啲睇下Menu有咩食。直接叫左新麻蒲宵夜時段套餐，$258 3份肉 + 1份菜同埋2隻蝦，雖然肉比較細份，但係太夜唔好食太多肉，價錢都算合理。宵夜時段套餐 $258點菜後好快就上左配菜，有芽菜，泡菜，生菜。雖然係宵夜時段，但肉都算新鮮，新麻蒲肉嘅味道都算唔錯，特別係護心肉，真係好好食，而且調味唔會太鹹或者太重口味，都保留到肉本身嘅味。但係蝦就冇咁新鮮，食落肉質都有小小霉。爐邊蛋真係韓燒嘅必食之一，而且新麻蒲可以任加配菜同爐邊蛋，呢個值得加分。驚唔夠飽我地外加左主食新麻蒲部隊鍋 $68，同埋全洲拌飯 $68部隊鍋就冇咩特別，午餐肉，年糕，拉麵，部隊鍋係唔會難食嘅items之一。但全洲拌飯相對上比較有驚喜，本身以為拌飯會冇咩味，要加個辣醬先會好食，但係本身拌飯加左麻油同小小醬汁，食落都唔會話好乾好難入口，而且配菜好多，撈埋一齊食就算唔加辣醬都好好食。飲品叫左桑莓果醋同埋西柚果醋，味道好清新完全解除左食肉嘅膩感，雖然一開始比較甜，但係等一陣冰溶左啲啲之後甜度剛好，唔會話飲到後期會完全冇味。