Made in HK Restaurant (Closed)

睇完戲出嚟行陣街就嚟咗呢度食晚飯，方便就腳。 之前呢個位嘅餐廳生意麻麻，但係轉左Made in HK 就旺場好多。晚市套餐最抵食，有餐湯或沙律、主菜同埋餐飲，都係百幾至二百幾蚊不等。 好多嘢食都仲可以升級或加配，食豪啲啲。飲湯有餐包送，而今日餐湯係忌廉蘑菇湯，夠稠身，不過味道就一般般喇。加$38可以升級龍蝦湯，我覺得呢個係必加，質地唔係好杰身嗰啲，比較輕盈，龍蝦味好香濃，入面雖然冇龍蝦肉，但係就會有一粒雲吞，幾搞笑。天氣凍，最啱就係揀番個鐵板餐，熱辣辣，味道又香。龍蝦及肉眼扒鐵板晚餐$258嗰半隻龍蝦係最吸睛，大大隻又燒過。 肉眼扒就好大塊，而且薯條特別多。是日鮮魚餐$168今日係三文魚，魚肉好厚身，魚皮亦煎得香脆，最誇張係下面嘅薯蓉，分量大到食極都食唔完。肉眼扒拼大蝦伴薯菜$183兩隻大蝦都算幾大隻，肉質彈牙。 不過薯條就炸到好乾身，有啲硬。 肉眼扒好大塊，叫咗五成熟，中間仍然顏色粉嫩。 而且仲配搭左好多蔬菜，均衡飲食。餐飲我最鍾意嘅就係即磨咖啡，香濃美味，聞到都已經好香！