逸翠軒點心專門店 (Closed)

近期好似多左好多點心專門店，逸翠軒喺尖沙咀就有兩間分店，而家連夜晚都可以嘆點心，好方便。食客除左好多都係遊客之外，有唔少都係本地人，行完街嘆返個夜茶，幾籠點心，夠晒開心啦。茶位$4，但就冇得揀咩茶，如果有得揀咩茶會更好。如果鍾意食盅頭飯，有套餐供應添。我就鍾意飲湯，淮山杞子元肉燉老雞湯原盅上枱，多材料又幾清潤。逸翠鮮蝦餃係有綠白兩隻色，賣相靚之餘入面仲有好多筍同蝦肉，真材實料。蟹籽蒸燒賣入面雖然有蝦同豬肉，但就食到幾舊肥豬肉，唔係我喜歡的。芝心蝦春卷即炸夠脆口，入面加左芝士有拉絲效果，呢個配搭唔錯。叉燒菠蘿包一次滿足兩個心願，細細個幾cute。薑汁棗拉糕作為甜品，棗味濃薑味就唔多夠，偏甜。所有野食都冇加一，每人幾十蚊夠經濟。