不toast不快 (Closed)

放假到葵涌廣場shopping, 手挽一堆戰利品諗住返歸之際，見到三䄛Top世界有間韓式吐司小店，“不toast不快，像極了愛情”。令我諗起疫情之前去首爾旅行，好多個朝早都要去附近連鎖吐司店買番個toast先開始一日嘅行程。果種懷念嘅感覺，真係像極了愛情。小店招牌好醒目，而且吐司種類非常之多，每一款賣相都好吸引。既然未試過，梗係從最基本嘅口味開始啦。流心芝蛋拉絲吐司（$34）餡料有芝士、炒滑蛋同椰菜絲，上面仲有大量蛋黃醬同茄汁，份量多到撐開左整個吐司，攞上手已經有幸福嘅感覺。炒蛋係超級滑，熱溶嘅芝士同炒蛋混和，一啖咬落去有長長嘅拉絲效果，真係好正。麵包本身係搽左牛油再煎過，香氣撲鼻，而且食落有鬆脆嘅沙沙聲，成個吐司質素真係同韓國果間有名嘅吐司店有得揮。而且價錢非常之親民，下次再黎一定會試埋其他口味。