祥興記上海生煎包 (Closed)

本來已經出名，米芝蓮推介埋就更加多人。但呢間鋪勝在 turnover 快， 好似澳牛一樣，條龍好快就消化晒。先買食物後入座，1pm 去到等左 5 分鐘左右就有位坐。今次叫左個特色餐，每個餐有兩粒生煎包、一碗上海雙檔 （麵筋+百葉包配上粉絲湯）加一杯飲品。烏梅汁酸酸甜甜好開胃，比起豆漿成為一個特別少少既選擇。好中意食上海雙檔，入面個百葉包同麵筋都係有包住肉，湯味鮮甜，清清地但出奇地滿足。個生煎包認真不得了，我建議用食小籠包既方法，先係上面開一小洞，食到芝麻香又可以吸啜湯汁，再加啲醋入去飲埋剩底既湯。生煎包底部厚，煎脆左好香口，配埋裡面粒肉丸同上層既軟皮，口感三重奏而且味道濃郁，極上體驗！