90s Lazy (Closed)

餐廳播住90年代日本歌，日式木系風格，環境乾淨整齊。餐牌有set dinner包是日餐湯及飲品，如特色飲品就半價。另外亦可散叫，種類偏多，價錢合理。最後我同老公就叫左兩個套餐，然後再叫左個pizza，飲品半價就叫左拉花咖啡同乳酪特飲。是日餐湯：周打硯湯口感creamy，有西芹同紅蘿蔔，飲得出蔬菜味道。懶人包：老公話呢個懶人包好吸引，仲豐富過平日嘅all day breakfast。有煙三文魚、蕃茄、煙肉、豬肉腸、薯餅、炒蛋、燒烤腸、茄汁豆、粟米粒、雜菜沙律同牛角包，共11款配料。其中炒蛋炒得好靚，有晒蛋汁，煙肉煎到好香脆，牛角包好有牛油味，總之就係好飽，好好食。烤雞肉鮮茄意大利飯：雞肉烤得幾靚，加左少少黑椒，雞肉都算嫩滑。意大利飯煮得幾正宗，咬落有口感，每一啖都充滿醬汁，鮮茄味濃，裡面仲有洋蔥同菇等，甜甜酸酸，開胃好食。海鮮大板燒薄餅：有鮮蝦同魷魚，另外仲有椰菜，食落清新爽口。醬汁係沙律醬，整體真係好有大板燒感覺，唔錯。Mocha (熱)：打卡之選，所有熱飲都有拉花，mocha味道夠濃，甜度剛剛好。芒果乳酪特飲：淡淡芒果味，乳酪酸酸少少甜甜，夠凍，口感好rich，夏天飲佢就啱晒。