MOS Burger (新都城中心一期)

Open Now

Now Closed

週末晚到處都人山人海， 要搵嘢食都真係唔係咁容易， 快餐店算係比較容易埋手嘅類型。呢間漢堡包店係日本過嚟嘅， 包括我自己在內相信好多人都有食過， 今次見佢有新款嘅包就一於介紹下。點菜嘅形式都係揀咗一個包， 再配你想要嘅組合， 例如你可以揀薯條 ，薯餅 或者炸雞。我同飯友分別點左個魚柳包同埋法式和牛漢堡， 配大嘅厚切薯條同埋北海道薯餅。呢度嘅漢堡包質素算係十分穩定， 雖然係大型連鎖快餐店， 但每次光顧， 總會發現漢堡包嘅包皮係外脆內軟。 以漢堡包中間嘅肉同埋醬料都算係非常高質， 絕對係m記不能比擬的。呢度嘅魚柳包係我嘅至愛。無他， 因為魚柳炸得香脆， 配搭呢度獨有嘅沙律醬汁， 調出魚柳嘅味道。 每一啖都係幾juicy又香濃嘅口感！至於法式和牛漢堡， 用咗經典燒烤醬汁， 配以無數生菜絲， 夾著厚切和牛漢堡。 每一啖都充滿層次， 最重要係佢塊和牛多汁， 咬落一啲都唔柴。厚切薯條都算係呢度嘅經典菜， 外脆內軟唔在講， 味道鹹鹹哋， 搭配濃沃嘅薯仔味， 真係食上癮。北海道薯餅外表炸得金黃 鬆脆， 裏面 係薯仔蓉 搭配一啲牛肉粒， 食落滋味。