楓林小館

Open Now

Now Closed

呢度好近我公司，啲嘢又幾好食，所以老細成日都請我哋去呢度食 lunch。今日五個人叫咗好多嘢，食唔晒要打包。我最鍾意食香口嘢，叫咗蝦多士同椒鹽白飯魚，蝦多士係幾好食的，夠脆，唔會油淋淋，不過成 $40 一件，我覺得都幾貴。佢啲蒸點心都好食，蝦餃燒賣大大粒，皮薄饀靚，啲蝦又新鮮，個黑松露帶子餃用料十足，配搭得宜，超讚。炒粉麵都好正，亁炒本地牛河好夠鑊氣，啲牛肉好腍好軟熟，懷舊肉絲炒麵啲麵脆卜卜，掂！奶黃煎堆仔圓轆轆，好飽滿，流心奶黃爆晒饀，外脆內軟。