天勝

Open Now

Now Closed

今晚嚟到呢度，為嘅就係日本嘅味道，餐廳都好和風格局。侍應安排我哋坐入房仔，不過間房就要同另一枱嘅人一齊，有啲怪咁。叫咗樽北海道梅酒飲吓先，味道唔錯喎，夠香梅味，又唔太甜。吞拿魚蓉卷，魚蓉好甜，不過飯就唔夠實，比較鬆。鯖魚棒冇得頂，原條鯖魚半生熟，實在少有，魚腹肉嫩魚油香，醋飯係比普通嘅多一點點醋味。魚背係最好食，比魚腹係彈牙更有口感。辣味八爪魚普通啦。蟹膏甲羅燒，蟹膏濃縮到不得了，香噴噴熱辣辣，一啖之後滿口都蟹膏。牛油炒鮑魚，鮑魚新鮮彈牙，比牛油包住一啖入口，兩種味道好夾而又唔會搶走啲味。燒雞軟骨同雞翼都係普通，雞翼仲燒得比較差。麵豉茄子，茄子肥美多汁，配上少少麵豉佐酒小食。秋刀魚，魚皮都算有少少脆，魚肉嫩香帶少少魚油。燒牛舌要燒得好食，唔係個個得，呢度真係掂，嫩到又咬得開，唔韌，仲要見到粉紅色，就算放咗一陣，粉紅色都冇啦，入口都唔韌嘅，冇得頂。最後食埋個蟹炊，蟹肉唔算多，湯水有啲清酒味，蟹味就唔算凸出，比較清。喺房仔每次要搵服務員都要起身行出去，呢點有啲改善空間，侍應服務都好好。