天丼

Open Now

Now Closed

又係收工去屯門練箭前搵埋老友食晚餐，老友建議話黎呢間天丼食，睇返資料係專食天婦羅既餐廳，仲要係日本過江龍，咁一於黎試下啦。夜晚7點左右黎到唔洗排隊，店面都唔算好細，都有十幾張枱，格局都幾有日本風味，餐牌食物款式唔算話特別多，離唔開都係天婦羅配飯或麵或烏冬，主要都係炸野，桌上會有d調味料，落單用QR code，另外餐廳會免費供應熱麥茶無限添飲，麥茶麥味好濃，我覺得幾香幾好飲。天婦羅蕎麥冷麵先講講麵，麵質地都唔錯幾爽口，跟埋個凍湯加d芥辣好夾，天婦羅有黑虎蝦，蟹柳，蓮藕，茄子同四季豆，天婦羅炸得都算剛剛好，不過上枱時未算係好熱果隻，整體上味道幾唔錯。淺草海老天丼老友揀既，有3隻天婦羅蝦，其他都係蔬菜類，米飯睇落唔似用珍珠米，老友話d天婦羅擺係飯上面搞到d炸物無咁香脆，影響左口感如果分開擺會好d。八爪魚天婦羅另外加份小食，八爪魚都幾粗身，但無乜特別，我覺得普通啦。整體黎講食物質素算是不錯，高質又稱唔上，好多日式餐廳都做到既水準，全部都香口野，不過選擇就真係唔算多，主要食天婦羅，環境方面都幾舒適，店員添茶都算幾密幾勤力，呢方面都唔錯，價錢方面算是中規中矩啦。