天鳥居酒屋

Open Now

Now Closed

今晚入左天水圍探朋友同食飯，朋友話佢屋企附近有間新開既日本野，所以就去左試試。呢間日本野格局幾好，每張枱都好大，可以坐得舒舒服服咁食野。食物選擇都非常多，有鍋物，串燒，魚生壽司等等，而每個種類都有勁多款式可以揀！！朋友本來提議食牛肉鍋，但我唔係好想食得太heavy，所以最後我地都係選擇散叫串燒同壽司食。燒秋葵調味岩岩好，好香口，上面仲有啲木魚絲，幾正。燒雞心第一次食，以前未食過所以叫左黎試。燒得幾香口，質感有啲彈牙，但係又未到雞腎咁爽口。燒牛舌心正！厚切既牛舌彈牙有口感，燒得剛剛好，唔會老，不過調味相對黎講咸左少少。燒雞軟骨脆口，燒得好香幾好食。呢個池魚set係店員推介，兩舊反卷出面有蕎麥粒，脆脆地幾得意。深海池魚刺身幾滑身，不過魚味唔夠濃，配上旁邊既醬汁幾開胃。手釣池魚壽司都係魚味唔夠濃，唔知係咪因為上面既薑味太重。壽司方面正正常常，用料都ok新鮮，不過今次既壽司飯略嫌濕左少少。屋邨小店水準都唔錯，特別係串燒幾突出！下次有機會既話即管再試下佢既牛肉鍋！