麻布茶房 (Closed)

懶悠悠嘅Sunday,下午茶時間走左去食甜品～九龍灣麻布廚房～餐牌上面嘅甜品好吸引，做到同日本冇咩分別哦^_^，但味道就未知住～入座後，店員好細心遞上暖笠笠嘅綠茶，茶杯好別緻，綠茶暖度又啱啱好～外面天氣炎熱，店內冷氣相當足夠，好清涼！暖暖嘅綠茶剛好中和一下突變嘅室溫～貼心哦！落單後，店員好細心告知，甜品制作需要啲時間，麻煩客人耐心等候～其實都唔使等好耐，甜品好快上檯，不過有店員嘅主動提點，又加一分吧！宇治金時扭紋雪糕淋上綠悠悠嘅綠茶醬汁，外型好吸引！雪糕下仲有舊2cm厚嘅日本蕃薯！雪糕味道偏淡，奶味唔夠濃，但配上綠茶醬汁味道就啱啱好！蕃薯肉偏乾，蕃薯味普通偏淡。雪糕食到臨尾唔夠醬汁，所以變到冇咩味⋯白玉蜜果冰淇淋賣相都唔錯，配料色彩繽紛，附上黑糖醬淋上雪糕用。雪糕原味與宇治個雪糕同出一徹，所以都冇咩味，要加上黑糖醬先夠甜，配料有士多啤梨、白肉水蜜桃、湯丸、杏甫肉⋯樣就靚，但⋯可惜冇乜味，士多啤梨偏酸，湯丸冇餡冇味，仲有代表「白玉」嘅大菜糕?⋯冇味！！噢⋯整體上只有雪糕係接受到，質地幼滑！雖然奶味淡，但其他配料都係多此一舉！外表係可以做到好似日本甜品咁吸引呀，但味道就⋯回頭機會好低喇。