Video
Read full review
2012-11-06
115 views
以前團契導師晌非洲宣教，一家返香港述職，相隔好似又幾年無見，自不然要聚一聚啦，搞手唔喺小弟，今次探訪、晚飯都由他人負責，唔使操心淨喺等埋位，幾好呀！多謝晒相關人士啦。因為導師暫住晌佐敦，所以晚飯選址當然晌番佐敦。依區真喺好耐無嚟過，對上一次可能喺四年前去嘅金山海鮮酒樓咯。揀中瀛素食，就因為有人試過幾好，介紹俾大家。瀛素食，睇名都參透到少少玄機，日式 + 素食，打個餐牌頭幾頁，又壽司、又手卷、仲有卷物、刺身、炸物……等等，唔講真喺有錯覺去咗間日本餐廳呀。不過咁，再揭後啲，發現仲有意粉、湯羹、小菜、粉麵飯，就知單靠賣「和食」可能唔多掂，多元化喺港式餐廳做生意嘅典型。講真，又真喺幾多選擇，過百款有多啦！環境格局談不上有咩和風味，只喺牆上掛咗日本料理相。白色牆身，深啡木枱，啡白木櫈，裝修簡約，時下大路嘅裝修，做邊類食店都得。廢話講多咗，開始跟大家分享吓當晚食咗乜先：櫻花玉子壽司 $16造型幾得意，色澤配襯又幾靚，但飯粒有啲鬆散。牛油果鰻魚卷 $30一客有4件，但捲得幾求其，飯粒鋪得又唔平均，牛油果又蹺起。啲米飯煮得有點爛，所以食起上嚟口感有啲黐牙。但喺，食咗唔知邊忽扮鰻魚喎？加洲卷 $50一客
因為導師暫住晌佐敦，所以晚飯選址當然晌番佐敦。依區真喺好耐無嚟過，對上一次可能喺四年前去嘅金山海鮮酒樓咯。揀中瀛素食，就因為有人試過幾好，介紹俾大家。瀛素食，睇名都參透到少少玄機，日式 + 素食，打個餐牌頭幾頁，又壽司、又手卷、仲有卷物、刺身、炸物……等等，唔講真喺有錯覺去咗間日本餐廳呀。不過咁，再揭後啲，發現仲有意粉、湯羹、小菜、粉麵飯，就知單靠賣「和食」可能唔多掂，多元化喺港式餐廳做生意嘅典型。講真，又真喺幾多選擇，過百款有多啦！
環境格局談不上有咩和風味，只喺牆上掛咗日本料理相。白色牆身，深啡木枱，啡白木櫈，裝修簡約，時下大路嘅裝修，做邊類食店都得。廢話講多咗，開始跟大家分享吓當晚食咗乜先：
櫻花玉子壽司 $16造型幾得意，色澤配襯又幾靚，但飯粒有啲鬆散。
牛油果鰻魚卷 $30
一客有4件，但捲得幾求其，飯粒鋪得又唔平均，牛油果又蹺起。啲米飯煮得有點爛，所以食起上嚟口感有啲黐牙。但喺，食咗唔知邊忽扮鰻魚喎？
加洲卷 $50
一客有成8件咁多，真喺好喇。哈哈，甘筍粒抄蟹籽，霎眼望落去有啲似喎。不過，賣相認真麻麻，「蟹籽」黏得求其，啲沙律醬又唧得幾肉酸吓，而且唔使唧咁多囉。啲卷物真喺佢哋嘅弱項！
加洲手卷（$18）、吞拿魚手卷（$18）、軟殼蟹手卷（$18）由其他人試咗，所以味道就唔評喇，但外觀又扮得幾OK喎，尤其是件吞拿魚手卷。
吉列豬扒蛋飯丼 $48 另一款扮嘢得主，望落同平常食到嘅吉列豬扒蛋飯毫無分別架，就算睇埋啲吉列豬扒嘅「肉質」，絕對過到骨呀！飯、滑蛋、醬汁都做得唔錯，件「吉列豬扒」當然無得跟真嘅相比，始終只不過喺豆類製品，但至少都炸得甘香。
避風塘一口茄子 $48有啲失望嘅小食，因為食唔出避風塘嗰種惹味甘香嘅炸蒜粒，徒有軀殼而無靈魂嘅「避風塘」，所以，茄子好唔好都變得無關重要！
鮮茄什菌浸菜苗 $52無扮嘢嘅素菜，浸菜苗變咗浸白菜仔，什菌只有冬菇，都無所謂啦，不過整體味道平淡，唯一可講就喺佢頗健康。
鮮菌鮑片海皇豆腐煲 $58海皇用上素魷魚、素蝦，配上冬菇（所謂鮮菌！）、素鮑片、豆腐所做嘅煲仔菜，素鮑片質感又幾似真鮑喎，豆腐又非常嫩滑，依個煲仔都幾好食，只喺略嫌芡汁太多。
鮮菠蘿咕嚕肉 $58菠蘿喺罐頭貨，談不上鮮，而咕嚕肉喺齋鹵味，扮得較為失色。個甜酸汁還可以，不過份量頗為少。
松子蛋白薑米煲仔飯 $52話喺煲仔飯有啲言過其實，點講都只喺用煲仔載嘅炒飯啫。雖然個名有啲作大，但個飯又炒得幾好食，飯粒炒得爽身唔油，又多配料：松子、蛋白、翠玉瓜粒、粟米粒、椰菜絲，薑味隨飯粒微微滲出，表現含蓄。
乾炒牛河 $48第一個觀感，就喺好油，跟健康素食背道而馳。啲素牛肉質感較散較削，河粉上色唔勻巡，唔算一碟理想嘅牛河。
日本海鮮比薩 $78小朋友最鍾意依個，香口嘛。批底喺薄身嘅「餅乾」底，挺鬆脆，上面放有素魷魚、素蝦、車厘茄、冬菇、洋蔥、青椒……等等，食落幾滋味。
小弟本身唔喺素食者，不過一年有一、兩次會同舅母食齋，因為佢喺教徒。食親都喺正統煮嘅齋菜素食，扮晒嘢嘅素食就極少接觸，因為印象中都喺好睇唔多食，感覺得個樣。今回嚟到瀛素食，總結個感覺，都喺一樣，好睇得嚟扮得唯俏唯妙，味道就只喺中中等等，貪得意嘅都值得不妨一試。溫韾提示：消費要收加一，又唔收信用卡，臨尾食完送咗2張$50優惠券（收銀阿姐話喺現金券），要食滿正價$150可用一張，算幾著數，不過期短，只有一個月限期，誠意有限，最後張優惠券用唔著，但唔覺可惜喎。
Post
