嵐橋丼飯專門店 (Closed)

已經大半年冇得去旅行，唯有係香港食下日本菜當自己飛左。早排同朋友去左呢間位於尖沙咀既丼飯專門店，裝修有啲似居酒屋，價錢就中規中舉，一個SET$200左右（丼＋湯），算係合理。同朋友分別叫左個極上海老二重丼同極上海之幸丼，因為真係太難揀，所以就叫左兩個都係MIX既，等大家都可以試多啲。就份量而言真係對得住個價錢，全部刺身都好肥美大份，成個碗都放滿哂，就算我地SHARE食都每人分到唔少，賣相就已經好吸引。味道方面其實都冇咩好挑剔，基本上都夠新鮮，呢到既海老係我食過既日式餐廳入面算係最好既頭幾間，完全冇腥味仲好juicy，另外每份都有啲三文魚籽可以撈飯食，簡直係一流。飯底佢有啲醋啫哩粒粒，幾驚喜，我自己中意食酸野既覺得唔錯，但友人就話太酸。最後叫多份牛舌同埋蕃薯仔，牛舌燒得幾好，仲好多汁；蕃薯仔就不過不失，一口SIZE好方便食。